Nire geografia emozionalean barna: Sulayr-eko tontorretatik Alhambrarantz, uraren bideetan
Programari ekin aurretik, briefing-saio bat egingo da partaideekin, bakoitzaren aurreikuspenak bateratzeko eta gaitasunak egiaztatzeko.
Zeharkaldi bat izango da Sierra Nevadan barna, eta mendigune horretan 3.000 metrotik gora dauden 14 tontorrak igoko ditugu; besteak beste, penintsulako sabaia, Mulhacen (3.479 m). Sulayr-eko (eguzkiaren mendiak) hirumilakoen sokari jarraituz, ibilbidea Alpujarretara jaisten da, uraren bidean, antzinako ubideen paraleloan oinez. Arabiar herriak eraiki zituen ubideok, soroak ureztatzeko eta Nazari erresumako hiribururaino ura eramateko. Programa ixteko, bisita pribatua egingo dugu Granadako Alhambra jauregiko antzinako uharkak ikusteko. Ibilbidean zehar, naturagunean eginiko lana lehenetsiko da. Gauak honela egingo ditugu: lehen gaua mendilerrotik hurbileko landa-inguruneko hotel batean, bigarrena eta hirugarrena aire librean bibaka eginez, laugarrena Alpujarretako landa-inguruneko hotel batean eta bosgarrena Granadako hotel batean.
Asmo handiko programa honen helburua kontzientzia emozional handiagoa hartzea da, eta, horrez gain, gure emozioak hobeto kudeatzen laguntzeko argibideak ematea. Uste dugu ez dagoela emozio onik edo txarrik; aitzitik, emozio funtzionalak edo disfuntzionalak daudela, zer testuingurutan eta zirkunstantziatan sortzen diren. Lanari ekiteko, ibilbide bat egingo dugu gure biografia pertsonalean: txiki-txikitatik emozioak nola kudeatu izan ditugun aztertuko dugu eta horretan eragina izan duten sinesmen eta iritzietan arakatuko dugu. Emozioak diogunean, gure emozioez eta emozioen dimentsio sozialaren gure pertzepzioaz ari gara. Mapa pertsonal horretatik abiatuta, emozioak kudeatzeko gaur egungo eredua identifikatzen saiatuko gara, zein kudeatzen ditugun zailtasun handiagoarekin eta zein errazago edo egokiago identifikatuz. Gure geografia emozionalean barna, oinarrizko emozioak jorratuko ditugu (tristura, poza, beldurra, haserrea eta maitasuna), baita izaera sozialagoa dutenak ere, emozio ikasiak (lotsa, anbizioa, inbidia, etab.). Bidaia honen jomuga bestelako mapa bat egitea da, horren bidez gure geografia emozionalean zehaztasun handiagoz mugitu ahal izateko. Programa aurreratua da, hala maila fisikoan nola norberaren barnean egin beharreko lanari dagokionean.
